هي كلمات (35)

صباح التفاؤل يااااارب..

((هي كلمات نبحث من خلالها عن أريج تطيب له النفوس وتجتمع عليه القلوب..))

هادي المزهرية لو داك الصحن اللي كسره الجاهل، يصير انت بعد بدون ما تدري يطيح من يدك وينكسر لو لا؟

تعال يا الأبو بقولك، وتعالي يا الأم بقولش:

چم شي إدا انت اللي سويته فميخالف وحلو بارد، لكن إدا اللي أصغر منك سواه وخصوصًا إدا كان أخوك لو ولدك فتطلعه من ملة الإسلام بالصراخ والمزاعگ ويمكن الضرب بعد؟؟

في دمتكم هاده مو ظلم؟؟

انزين هو يچوفك تغلط وتسوي أشياء عن غير قصد ومحد يحاسبك.. لا ويمكن تگلبها نكته وتقعد تضحك بعد!!

لكن إدا هو اللي سواها.. واويلاااااه!!

چيه عمبالكم حگويه أولادنا يچدبون علينا ويسوون أشياء من ورانا؟؟

لأنا احنا نعلمهم على الچدب واللف والدوران، وتالي إدا الواحد منهم چدب شلخناه من الصراخ والمزاعگ والضرب بعد..

تره يا جماعه أولادنا أمانه في رگابنا..
لازم نعلمهم الثقة بالنفس والصدق، مو كله نفشلهم ونچعمهم ونصادف بهم..

تره عييييب يا جماعه عييييب..

صباحكم رهشه بالفستق وخبز خباز صاااااخن..

 

السيد محمد علي العلوي
22 صفر 1435 هجرية

26 ديسمبر 2013 ميلادية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *